万事美妙

行过世界千千 kiânn kè sè-kài tshian tshian
纷纷扰扰 拢无重要 hun-hun-liáu-liáu, lóng bô tiōng-iàu
思想美妙 万毒不侵 su-sióng bí-miāu, bān to̍k put tshim

2024 年司公钘仔花的第三张专辑《万事美妙》已经攒好势矣，这摆欲带来几若条无仝款又阁特别的台语歌曲，精彩内容绝对予你想袂到。
《万事美妙》内面每一块歌曲拢用无仝的角色落去设想，替这个主角表达想法，见面头一条有讲古仙代先做介绍，然后仙人予你启示佮祝福，阁来是生份人无奈的心声，斡一个斡去拄著一位有智慧的人，伊提醒一阵人爱较精光咧，毋通像七月半鸭仔，“毋知死活”。绁落来是对著社会事件大声嚷，发觉著现实嘛是譀譀。伫咧巷仔口拄著相命仙共咱问话，予咱加正济自信，后来阁去拄著一对热恋的爱人。这马镜头换来到细汉的时，学校内底的塑胶品仔乐队，予咱雄雄去思念著过往的序大人，目屎拭拭下，读一篇少年政治犯的自白书。落尾，路边一位表演的艺人用伊的歌声来鼓励咱重新出发。规张专辑袂输是缀司公钘仔花四界看，有时批评、有时趣味，留出真济空间予听众家己感受、家己思考。

2024 nî Sai-kong-giang-á-hue ê tē-sann tiunn tsuan-tsi̍p ‘Bān-sū-bí-miāu’ í-king tshuân hó-sè--ah, tsit-pái beh tuà-lâi kuí-lō tiâu bô kāng-khuán iū-koh ti̍k-pia̍t ê tâi-gú kua-khik, tsing-tshái luē-iông tsua̍t-tuì hōo-lí siūnn bē kàu.
‘Bān-sū-bí-miāu’ lāi-bīn muí tsi̍t tè kua-khik lóng iōng bô-kāng ê kak-sik lo̍h khì siat-sióng, thè tsit-ê tsú-kak piáu-ta̍t siūnn-huat, kìnn-bīn thâu tsi̍t tiâu ū kóng-kóo sian tāi-sing tsuè kài-siāu, liân-āu sian-jîn hōo-lí khé-sī kah tsiok-hok, koh lâi sī tshinn-hūn-lâng bô-nāi ê sim-siann, uat tsi̍t-ê uat khì tú-tio̍h tsi̍t uī ū tì-huī ê lâng, i thê-tshínn tsi̍t tīn lâng ài khah tsing-kong--eh, m̄-thang tshiūnn tshit-ge̍h-puànn ah-á, ‘m̄ tsai sí-ua̍h’. Suà--lo̍h-lâi sī tuì tio̍h siā-huē sū-kiānn tuā-siann lióng, huat-kak tio̍h hiān-si̍t mā sī hàm-hàm. Tī-leh hāng-á-kháu tú-tio̍h siòng-miā-sian kā lán mn̄g-uē, hōo lán ke tsiànn tsē tsū-sìn, āu--lâi koh khì tú-tio̍h tsi̍t tuì lia̍t-luân ê ài-lîn. Tsit-má kiànn-thâu uānn lâi kàu suè-hàn ê sî, ha̍k-hāu lāi-tué ê sok-ka phín-á ga̍k-tuī, hōo lán hiông-hiông khì su-liām tio̍h kuè-óng ê sī-tuā-lâng, ba̍k-sái tshit tshit--ē, tha̍k tsi̍t phinn siàu-liân tsìng-tī huān ê tsū-pi̍k su. Lo̍h-bé, lōo-pinn tsi̍t uī piáu-ián ê gē-lîn iōng i ê kua-siann lâi kóo-lē lán tiông-sin tshut-huat. Kui-tiunn tsuan-tsi̍p bē-su sī tè Sai-kong-giang-á-hue sì-kè khuànn, ū-sî phue-phîng, ū-sî tshù-bī, lâu tshut tsin tsuē khong-kan hōo thiann-tsiòng ka-kī kám-siū, ka-kī su-khó.