民生路口

大学上尾的坎站—毕业
咱用这条歌来记录学校内、附近佮阮生活的记持，共上媠的点点滴滴留落来

树顶的斑芝花
Tshiū-tíng ê pan-tsi-hue
开满四年的留恋
Khui muá sì-nî ê liû-luân
路边的野草
Lōo-pinn ê iá-tsháu
共幼茈褪掉
Kā iù-tsínn thǹg-tiāu
毕业典礼的相片
Pit-gia̍p tián-lé ê siòng-phìnn
有人欢喜有人哭
Ū-lâng huann-hí ū-lâng khàu
时间一直流
Sî-kan it-ti̍t lâu
流到选择的车头
Lâu kàu suán-ti̍k ê tshia-thâu

越头看 每一个熟似的形影
Ua̍t-thâu khuànn muí tsi̍t ê si̍k-sāi ê hîng-iánn
心内的咸汫
Sim-lāi ê kiâm-tsiánn
生活可能袂阁交插
Sing-ua̍h khó-lîng buē koh kau-tshap

再会啦 peh 袂起来的透早
Tsài-huē--lah peh buē khí-lâi ê thàu-tsá
买 Lu-lu-mi 的卵饼
Bé Lu-lu-mi ê nn̄g-piánn
再会啦 美乐蒂唱的歌
Tsài-huē--lah Mé-lo̍k-tì tshiùnn ê kua
唱甲逐家拢梢声
Tshiùnn kah ta̍k-ke lóng sau-siann
天光到暗暝 五花十色的日子
Thinn-kng kàu àm-mî ngóo-hue-tsa̍p-sik ê ji̍t-tsí
写袂完大学生活的酸甘甜
Siá bē uân tāi-ha̍k sing-ua̍h ê sng-kam-tinn
再会啦 离开只是暂时
Tsài-huē--lah lî-khui tsí-sī tsiām-sî

树顶的斑芝花
Tshiū-tíng ê pan-tsi-hue
开满四年的清芳
Khui muá sì-nî ê tshing-phang
褪壳的蝉仔
Thǹg-khak ê siân-á
已经诚做大人
Í-king tsiânn-tsò tuā-lâng
过去四冬的相片
Kuè-khì sì-tang ê siòng-phìnn
是记持起的大楼
Sī kì-tî khí ê tuā-lâu
时间一直流
Sî-kan it-ti̍t lâu
流到离别的十字路口
Lâu kàu lī-pia̍t ê si̍p-jī-lōo-kháu

越头看 每一个熟似的形影
Ua̍t-thâu khuànn muí tsi̍t-ê si̍k-sāi ê hîng-iánn
心内的咸汫
Sim-lāi ê kiâm-tsiánn
生活可能袂阁交插
Sing-ua̍h khó-lîng buē koh kau-tshap

再会啦 斗阵拍拼的学寮
Tsài-huē--lah tàu-tīn phah-piànn ê ha̍k-liâu
考试报告拢 all pha
Khó-tshì pò-kò lóng all pha
再会啦恁仔细 ko ni chi wa
Tsài-huē--lah an zii se ko ni chi wa
台检 B2 无咧惊
Tâi-kiám B2 bô leh kiann
声调汉字阁有罗马字
Siann-tiāu hàn-jī koh ū lô-má-jī
写袂完大学生活的酸甘甜
Siá bē uân tāi-ha̍k sing-ua̍h ê sng-kam-tinn
再会啦 离开只是暂时
Tsài-huē--lah lî-khui tsí-sī tsiām-sî

有一工咱会阁再相逢
Ū tsi̍t-kang lán ē koh tsài siong-hông