青苔仔tshinn-tî-á

青苔仔tshinn-tî-á，常见鸟类“绿绣眼”的台语用词。某一年的暑假，和一只小小绿绣眼的邂逅，当自己被一个生命认可，即使短暂，那种温暖的感觉却是可以记得一世人的。

唱/词曲/吉他：张庭漪
大提琴：张逸雯

未曾未 
Bē tsîng bē
你就缀我玲琅踅
lí tiō tuè guá lîng long se̍h
我犹无想遮济
guá iáu bô siūnn tsiah tsē
你就来缀
lí tiō lâi tuè

若是想欲 
nā sī siūnn beh
阁讲出心内话
koh kóng tshut sim lāi uē
遐济 拢是加讲的
hiah tsē lóng sī ke kóng--ê
 

已经几若冬
í king kuí nā tang
记袂清你的面模仔
kì bē tshing lí ê bīn bôo á
是思念阁予你 
sī su liām koh hōo lí
留伫心肝的缝
lâu tī sim kuann ê phāng
你的声 你的形影
lí ê siann lí ê hîng iánn
 
温暖的身躯伫我的手掌
un luán ê sing khu tī guá ê tshiú tsiáng
甘愿踮伫遮
kam guān tiàm tī tsiah
不时攑头 掠我金金看
put gia̍h thâu kā guá kim kim khuànn
是啥物缘分 有“你佮我”
sī siánn mi̍h iân hūn ū lí kah guá

未曾未 
Bē tsîng bē
你就缀我玲琅踅
lí tiō tuè guá lîng long se̍h
我犹无想遮济
guá iáu bô siūnn tsiah tsē
你就来缀
lí tiō lâi tuè

若是想欲 阁讲出心内话
nā sī siūnn beh koh kóng tshut sim lāi uē
遐济 
hiah tsē
你嘛已经袂赴揣
lí mà í king bē hù tshuē

（bridge）

若是
nā sī
无对树顶跋落下
bô uì tshiū tíng pua̍h lo̍h ē
欲哪有机会
bueh ná ū ki huē
就算无准备  
tiō sǹg bô tsún pī
无想好势
bô siūnn hó sè

未曾未 
Bē tsîng bē
你就缀我玲琅踅
lí tiō tuè guá lîng long se̍h
我犹无想遮济
guá iáu bô siūnn tsiah tsē
就来缀咱的身边
tiō lâi tuè lán ê sin pinn
无怨无戚
bô uàn bô tsheh

若是想欲 
nā sī siūnn beh
阁讲出心内话
koh kóng tshut sim lāi uē
遐济 （拢是加讲的）
hiah tsē （lóng sī ke kóng—ê）

彼年的歇热
hit nî ê hioh lua̍h
咱的路头伫遮
lán ê lōo thâu tī tsiah
你的毛犹阁氅氅
lí ê mn̂g iáu koh tsháng tsháng
目睭犹无白箍仔
ba̍k tsiu bô pe̍h khoo á